Zur Erinnerung an unsere Verstorbenen der letzten 12 Monate von Gabi Suhner, Gemeindeleiterin
Hed sie früehner Energie gha für zwei – als Muetter und Husfrau, als Büürin, Chöchin und Wirtin – so isch sie i de letschte Johr vo ihrer Demänzerchrankig immer ruhiger worde und hed sich z'letscht ganz i ihri eigni Wält zruggzoge. Am 21. Oktober 2019 isch d'Edeltrud (Trudi) Schleiss-Glaus im Wohn- und Pflägzentrum Neuhus erlöst worde; im Alter vo 83 Johr isch sie a de Folge vonere schwere Lungenentzündig gstorbe. Jetzt isch Gott ihre Gastgeber, wo sie umsorgt.
Als fürsorglichi Muetter und als stilli und usduurendi Schafferin isch d'Anni Steiner-Schmucki i ihrer Familie und i ihrer Arbet im Hus und uf em Hof verwurzlet gsi. Verwurzlet gsi isch sie aber genauso ime unerschütterliche Gottvertroue und im Gebät. Nach eme lange Wäg vom Abschied hed sie am Allerheiligetag 2019 im Wohn- und Pflägzentrum Neuhus ganz friedlich ischlofe und mit de villfältige Frücht vo ihrne 92 Läbesjohr zu ihrem Gott und Schöpfer heikehre dörfe.
Ufgwachse in Wängi, hed s'Läbe d'Annemarie Pustiasi-Schneider spöter a villi verschiedeni Ort gfüehrt, immer wieder hed sie müesse umzieh, zum letschte Mol im Summer 2019 is Alterszentrum Aaheim in Aadorf. Do isch sie am letschte Tag vom Johr, am 31. Dezember, 72-jährig vo ihrer schwere Lungechranket erlöst worde. So wie sie sich das gwünscht hed, hed sie uf eusem Friedhof ihri letschti irdischi Ruehestätt gfunde.
Als liideschaftliche Hobbygärtner hed er um de Chreislauf i de Natur gwüsst: uf jede Winter folgt de Früelig, uf de Tod s’neue Läbe. I dem Vertroue hed de August Nadler-Suter gläbt und gschaffed, i dem Vertroue isch er am 23. Januar 2020 dihei, i sinere gwohnte Umgäbig, gstorbe und hed sini 96 Läbesjohr i Gottes Hand zrugggeh. I sinere Hand isch er i guete Händ.
Im Alter vo 61 Johr isch am 29. Januar d'Ursula Bruggmann gstorbe. Sie, wo villi Johr chrank gsi isch, hed während ihrne letschte 3 Läbesjohr im Wohn- und Pflägzentrum Neuhus mit ere grosse innere Stärchi so Villes treit und ertreit. Trotz allem hed sie das letschte Kapitel do in Wängi als eis vo de schönste i ihrem Läbesbuech bezeichnet. Im chline Chreis vo Ihrne Aghörige händ mer sie drum uf ihre Wunsch hi uf eusem Friedhof bigsetzt.
Sie isch so e fröhlichi, gselligi und villi Johr engagierti Person gsi, umso schmerzlicher isch es für ihri Familie und eus alli gsi, de raschi körperlichi und geistige Zerfall vo de Leonie Thalmann-Wirth mitz'erläbe. Am 5. Februar isch für sie d'Zyt vom Sterbe cho; im Alter vo 87 Johr isch sie im Wohn- und Pflägzentrum Neuhus friedlich igschlofe und zu ihrem Gott heigange - dethi, wo’s keis Vergässe und kei Schmerze meh git.
Nach eme Läbe voller Arbet und Fürsorg für sini Familie und eme lange Liidenswäg händ de Josef "Sepp" Giger-Raschle sini Chräft verloh, und am 9. Februar hed er im Alterszentrum Tannzapfeland in Münchwile friedlich dörfe ischlofe. Mit eme tüüfe Gottvertroue hed er sich 87 Johr lang vo Gottes Händ gfüehrt und treit gwüsst, i dem gliche Vertroue hed er sich i sim Sterbe au i Gottes Händ falle loh. Jetzt isch er für immer i sine Händ ufghobe.
Sie hetti gern no ihre 100. Geburtstag im Oktober gfiiret, hed aber au immer gseit: "Wenn er mich rüeft, denn gang ich!" Am 14. Februar hed d'Martha Wismer-Wüest us Stettfurt Gottes Ruef ghört und isch überraschend schnell zu ihrem Gott und Schöpfer heikehrt. Uf ihre Wunsch hed sie uf em Friedhof vo Wängi ihri letschti irdischi Ruehestätt gfunde. Es riich erfüllts Läbe hed in Gott sini Volländig gfunde.
Völlig unerwartet isch am 8. März de Guy von Stürler-Ritter churz nach sim 90. Geburtstag gstorbe. Nach churzem Unwohlsi isch er im Kantonsspital Winterthur für immer igschlofe. I de erschte Wuche vom Lockdown hed nur de ängsti Chreis vo de Familie vo ihm chöne Abschied neh. So wie er es Läbe lang mit vill Liebi und Fürsorg für sini Familie und i de letschte Johr ganz bsunders für sini chrank Frau Alice do gsi isch, so wird Gott jetzt für ihn do si und für ihn sorge.
Es isch für ihri Aghörige schwer gsi müesse mit az'luege, wie d'Rosel Krähenmann-Jäger im Lauf vo Jahre langsam hed müesse ihres Läbe loh. 89-jährig hed am 25. März im Wohn- und Pflägzentrum Neuhus ihres müede Herz ufghört schloh. Uf ihre Wunsch hi händ mer sie im Grab vo ihrem Ma bigsetzt, und das – uf Grund vo de Corona-Krise – im chlinste Chreis. Nach allem Schaffe und Liide hed sie bi Gott, uf de sie es Läbe lang vertrout hed, die ewigi Rueh gfunde.
In bewundernswerter Art und Wiis hed d'Hedi Maldini-Goldmann ihri schweri Chräbserchrankig agno, hed ghofft und kämpft, aber am Schluss hed sie nümm möge. Ihre Tod im Alter vo 68 Johr am 27. März isch drum au en Erlösig gsi. Trotzdem isch für die Aghörige de Abschied vo ihrer herzliche und fröhliche Läbespartnerin, Muetter und Grosi i de Karwuche uf em Friedhof vo Matzinge schwer gsi, umso meh, als dass das au für sie nur im ängste Familiechreis möglich gsi isch. Doch die Verstorbeni sälber hed sie mit ihrne Abschiedswort tröstet: "Ich bin am Ziel, mir geht es jetzt gut, ich bin dankbar für alles."
E Wuche nach ihrem Hirnschlag hed d'Gertrude Wieland-Lanik am 8. April im Kantonsspital Frauenfeld friedlich dörfe ischofe. Es isch de Tag vom Supermond gsi, wo – wie's ihri Tochter usdruckt hed – "die Tore ins Licht weit offenstanden". Vor 82 Johr in Wien gebore, hed die sparsami und tapferi Frau mit eme grosse Herz ihre Humor und ihre Wiener Charme nie verlore. Im Wüsse, dass ihri Verwandte im Usland wenigstens in Gedanke und im Gebät debi sind, und im Vertroue, dass sie Ostere bereits im Himmel gfiiret he, händ mer sie im Chreis vo de allernöchste Aghörige im Gmeinschaftsgrab vo Matzinge bigsetzt.
Nach ere längere Zyt vom Immer-schwächer-Werde isch am 26. Mai de Bruno Bischofberger-Läubli 89-jährig gstorbe. Er hed sis Läbe als Gschänk verstande, wo er in erster Linie sinere Familie gmacht hed. Aber nöd nur: johrelang hed er sini Fähigkeite und Chräft au sinere Firma und i sine verschiedenste Aemter und Vereinstätigkeite em Dorf Wängi zur Verfüegig gstellt hed. Nach em Tod vo sinere Frau händ's sini Chind ihm zrugggschänkt, dass er bis am Schluss hed chöne i sim Hus bliibe und au dihei sterbe. Im ewige Dihei isch er jetzt wieder mit sim gliebte Bethli vereint.
Am 4. Juni isch de Urs Meier nach eme bewegte und bewegende Läbe zu sinere letschte Reis ufbroche und heigange. Im Alter vo 62 Johr isch er vo sinere schwere Chräbschranket erlöst worde, und sini Familie und villi Fründe händ – nach mänschlichem Ermässe vill z'früeh – do im Gottesdienst müesse vo ihm Abschied neh. Uf sin Wunsch isch sini Aesche spöter im Friedwald in Matzinge bigsetzt worde.
Guet 30 Johr vo de 55 Läbesjohr vom Roberto Bernasconi sind dur sini MS-Chranket prägt gsi. Trotz de zuenehmende Ischränkige hed er sis Schicksal mit bewundernswerter Stärchi und "in stiller Tapferkeit" treit und immer wieder s'Beste us de Situation usegholt – liebevoll betreut und umsorgt vo sinere Läbespartnerin, wo ihm do in Wängi i de letschte 11 Johr nomoll es neus Dihei gschänkt hed. Unerwartet isch er am 25. Juni für immer igschlofe, jetzt schänkt Gott ihm i sinere Ewigkeit es Läbe ohni Schmerze.
Nur 4 ½ Mönet nach em plötzliche Tod vo ihrem Pa und Opa, händ sini Chind und Aenkel au ihri Ma und Oma Alice von Stürler-Ritter müesse losloh. Ihres Sterbe isch en lange Wäg gsi, im Alter vo 98 Johr isch sie nach eme erfüllte Läbe am 20. Juli im Wohn- und Pflägzentrum Neuhus erlöst worde. Dasmol händ au die ville Verwandte us Holland zäme mit de Familie chöne vo ihre und vom Guy Abschied neh, dankbar, dass die beide jetzt wieder vereint sind – i ihrer ändgültige Heimet bi Gott.
Mir händ ihn als bescheidne, hilfsbereite und läbesfrohe Ma mit sim fascht scho legendäre Lache kännt und grad no gseh, do hed sini Chind und Gschwüsterti, sini SängerkollegInne und villi Fründe und Wägbegleiter ganz unerwartet d'Nachricht vom plötzliche Tod vom Beda Wismer-Wicki am 24. Juli erreicht. Als Buur hed er gwüsst: Wenn s‘Weizekorn nöd i d‘Erde fallt und stirbt, bringt’s kei Frucht. I dem Vertroue hed er Johr für Johr sini Fälder bstellt, i dem Vertroue hed er sis Läbe gläbt und verschänkt, i dem Vertroue isch er 74-jährig au gstorbe, us Gottes Händ wird er neus und ewigs Läbe empfange.
Sie isch e gschaffigi und resoluti Frau gsi, wo gwüsst hed, was sie will, genauso aber au e gueti und fürsorglichi Ehefrau, Muetter und Grossmuetter mit eme grosse und grosszügige Herz. Am 4. August isch d'Vreny Kohler-Krähenmann mit 92 Johr nach churzem Spitalufenthalt und ohni Angst in Frauenfeld gstorbe. Nach allem Schaffe, Sorge und Liide dörf sie jetzt bi Gott usruehe.
I de letschte Johr händ d'Chräft vom Hanspeter Häne-Herzner immer meh ab-geh, 86-jährig isch er im Wohn- und Pflägzentrum Neuhus für immer igschlofe. Drü Hüser sind i sim Läbe wichtig gsi, und sie stönd symbolisch für drü wichtigi Inhält vo sim Läbe: d'Schrinerei für sini Schaffenschraft, s'Wohnhus vis-a-vis für sini Fürsorg und Treui zu sinere Familie, d'Chile für sis Gottvertroue. I dem Vertroue isch er am 7. August au zum Hus vom himmlische Vatter ufbroche, det isch er jetzt für immer dihei.
Im Kantonsspital Frauefäld isch am 15. August d'Silvia Keller-Zeder im Alter vo 84 Johr gstorbe. Die letschte 8 Johr hed sie bi Ihrer Tochter und de Chatz Tüpfli in Münchwile gläbt. Dankbar, do nomoll es neus Dihei gfunde z'ha, hed sie so guet und lang als möglich, no bi diverse Hushaltsarbete mitghulfe. Uf ihre Wunsch händ mer sie im Gmeinschaftsgrab vo eusem Friedhof bigsetzt – do, wo scho ihre Ma und ihre allzu früeh verstorbni Sohn Bruno ihri letschti Rueh gfunde händ. So wie sie es Läbe lang für ihri Familie gsorgt hed, so wird Gott jetzt für sie sorge.
Die letschte 4 Johr hed d'Heidy Langhart-Rütsche bi ihrer Tochter in Ungarn gläbt, afangs September isch sie mit Herzbeschwerde i d'Schwiz zruggcho und do am 9. September im Alter vo 77 Johr überraschend schnell im Spital Münsterlinge gstorbe. Ihri Arbet im Wyberg und im Garte, d'Liebi zu ihrer Familie und d'Liideschaft für d'Handorgele und s'Fotografiere händ ihres Läbe prägt, und so händ näbst de Familie au villi WäggfährtInne sich uf em Friedhof und im Gottesdienst in Matzingen vo ihre verabschiedet. Sie hed in Gott ihri ewigi Heimet gfunde.
